Mera naam Kashika hai. Main ek gaon mein rehne wali aam ladki thi. Ye meri zindagi ki sachchi kahani hai, jo main apni diary mein likh rahi hoon.
Toh ye un dino ki baat hai jab main 6th class mein padh rahi thi. Main ek sant swabhav ki, kam bolne wali ladki thi.
Log mujhe kamzor samajhte the,
par unhe pata nahi tha ki ye ladki ek din kuch bada karegi.
Jiski shuruaat ho rahi thi ek naye safar se — struggle, strong aur alag si ladki banne ki shuruaat agli subah se hone wali thi.
Aaj subah kuch alag sa lag raha tha, jaise zindagi mein kuch badalne wala ho. 6th class mein padhne wali us sant swabhav ki ladki ko aaj pehli baar koi dost mili.
Isse pehle meri koi dost nahi thi.
Aaj pehli baar ek ladki aayi aur mujhse dosti karne ko boli.
"Kya tum meri dost banogi '
Main bahut khush hui, kyunki pehli baar koi mujhse dosti karna chahta tha.
Maine zyada soche bina use apna dost bana liya.
Uska naam Soniya tha. Wo mere hi gaon ki thi. Dheere-dheere hum bahut achhe dost ban gaye. Saath mein school jana, saath mein khana, hamesha saath rehna — aise hi din guzarne lage.
Dekh te hi dekhte humne 8th class tak ki padhai poori kar li.
Phir hum 9th class mein jaane wale the.
Hamare gaon mein sirf 8th tak hi school tha, isliye hume paas ke gaon ke high school mein admission lena pada.
Wahan humne ek bada sa school dekha aur bahut saare students. Main mann mein soch rahi thi — itne bade school mein itne logon ke saath padhna hai, pata nahi kaise honge sab. Bahut saare sawal dimaag mein chal rahe the.
Phir hamara admission ho gaya aur agle din se school start hona tha.
Raat ko main khana kha kar let gayi aur agle din ka intezar karne lagi. Main apne bachpan ke sapne ke baare mein soch rahi thi —
"mera sapna tha ki main badi hokar doctor banu aur apne gaon mein free ilaaj karne wala hospital kholu.,
Hamare gaon ke log bimaar padne par dusre gaon jaate the aur kai baar time par ilaaj na milne ki wajah se unki jaan chali jaati thi.
Isi liye maine thaan liya tha ki main kuch bada karungi.
Sochte-sochte mujhe neend aa gayi.
"Nyi subah, nyi duniya.. '
Agli subah meri aankh 7:30 baje khuli. Main uthi, nahaayi, brush kiya, choti banayi aur khana kha liya. Mere paas cycle nahi thi, isliye mujhe paidal hi school jana padta tha.
Main aur Soniya haste-khelte school pahunch gaye.
Wahan itne saare bachche the ki ek class mein sab nahi aa sakte the, isliye teacher ne do section bana diye — A aur B. Main A section mein thi aur Soniya B mein.
Ab hum alag ho gaye the. Hum dono udaas the, kyunki ab hum saath nahi baith sakte the.
Main apni class mein kisi ko nahi jaanti thi. Sab ajnabi the. Main soch rahi thi — kisse baat karu, kiske saath baithu?
Tabhi ek ladki boli, "Yahan jagah nahi hai kya? Mere saath baith jao."
Main khush ho gayi aur uske saath baith gayi.
Uska naam Neelam tha. Dheere-dheere hum baat karne lage.
Lekin lunch time mein jab main Soniya se mili, toh maine dekha ki uske naye dost ban gaye the. Dheere-dheere wo mujhse door hone lagi. Wo mujhe ignore karne lagi.
Jo meri best friend thi, wo bhi ab mujhe kamzor samajhne lagi.
Agli subah main akeli school gayi. Class mein last bench par baith gayi.
Teacher ne kuch sawalon ke jawab likhne ko diye. Main likh rahi thi, lekin mera pen kharab ho gaya.
Jab checking hui, toh sabko shabashi mili, par jab meri baari aayi, toh teacher ne mujhe daanta aur haath par danda bhi maara.
Mujhe bahut dard hua. Sab mere upar has rahe the.
"Mujhe bura laga — kya main sach mein kamzor hoon?
Main ghar aayi aur bahut royi. Maine socha — ismein meri kya galti hai agar main ek gareeb ghar mein paida hui hoon?
Khana kha kar main so gayi.
Kuch samay baad exams aaye. Maine bahut mehnat ki. Mere saare exams achhe gaye.
Lekin last exam ke din ghar aate waqt mujhe pet mein dard hone laga. Mujhe samajh nahi aa raha tha kya ho raha hai.
Main sirf 14 saal ki thi. Ghar pahunch kar maine maa ko bataya.
Maa ne muskura kar kaha — "Ghabrao mat, ye har ladki ke saath hota hai. Ye tumhara pehla period hai."
Main samajh nahi pa rahi thi, toh maa ne samjhaya —
"Ab tum bachi nahi rahi."
Dosto, ye sirf kahani nahi hai…
Ye ek sant swabhav ki ladki ki zindagi ka safar hai — jisme padhai, dosti, sapne,pyar, dard, zimmedari, aur kamyabi sab kuch hai.
Aage chal kar is kahani mein aur bhi bahut kuch hone wala hai…