Camp se aane ke baad sab kuch dheere-dheere normal ho raha tha. Zindagi fir se ek seedhe raste par chalti hui lag rahi thi. Isi beech mujhe mehsoos hua ki main Kishan ko pasand karne lagi hoon.
Par main kabhi usse keh nahi paayi.
Dil me socha tha ki pehle exam clear kar lungi, phir apne dil ki baat bolungi.
11th class me thi, sirf 16 saal ki… wo umar jahan emotions zyada hote hain aur samajh kam. Shayad wahi ek kaccha sa pyar tha, ya shayad sirf ek attachment, jo mujhe pyar lag raha tha.
Maine sapne dekhne shuru kar diye the—12th ke baad nursing course karungi, phir aage padhai karke doctor banungi, apna hospital kholungi… aur fir Kishan ke saath apni zindagi basaaungi.
Lekin zindagi ne kuch aur hi likh rakha tha.
Ek subah main bahut khush thi. School jaane ke liye taiyar ho rahi thi. Dil me naye sapne aur aankhon me chamak thi.
Tabhi achanak ghar me ek bada haadsa ho gaya. Mere dada ji achanak bahut bimar pad gaye. Unka checkup karwaya gaya, aur pata chala ki unhe cancer hai.
Ye sunte hi jaise sab kuch toot gaya.
Ghar ke sab log unke ilaaj me lag gaye. Paisa paani ki tarah behne laga. Karz pe karz liya gaya. Lekin itni koshishon ke baad bhi unhe bachaya nahi jaa saka.
Dada ji hume chhod kar chale gaye.
Unke jaane ka dard alag tha… aur upar se karz ka bojh aur bada.
Ghar ki halat itni kharab ho gayi ki khane tak ke paise nahi bachte the. Roz koi na koi karz dene wala ghar aa jaata aur paise maangta.
Papa ki aankhon me majboori aur thakan saaf dikh rahi thi.
Tabhi ek din pados ki chachi ne kaha, "Bombay chalo, wahan kaam mil jayega, sab theek ho jayega."
Humare paas aur koi rasta nahi tha. Par sabse bada sawal tha—padhai ka kya? Mera 12th me admission hone wala tha, bhai ka 10th aur bahan ka 8th… sab kuch daav par lag raha tha.
Papa chahte the ki sab saath chalein, par main unki aankhon me haar nahi dekh sakti thi.
Maine ek bahut bada faisla liya—
"Pehle parivaar, baad me sapne."
Aur bas, main bina kuch kahe, bina Kishan se baat kiye, apni padhai chhod kar papa ke saath Bombay chali gayi.
Aaj sochti hoon to samajh aata hai—Kishan mera pehla pyar nahi tha… wo sirf ek ehsaas tha, ek attachment jo kacchi umar me ho jata hai.
Mere jeevan me koi aur tha, jo sach me mere liye bana tha… par uska pata mujhe abhi nahi tha.
Bombay aakar zindagi bilkul badal gayi. Maine kai jagah interviews diye, kai baar reject hui, par aakhir ek company me entry-level job mil gayi. Dheere-dheere main kaam me mann lagane lagi.
Karz thoda-thoda chukne laga. Kishan ki yaadein bhi dheere-dheere kam hone lagi.
Ek saal baad, jab halat thodi sambhali, tab gaon se khabar mili ki open school ke form bharne shuru ho gaye hain.
Jo sapne maine chhod diye the, wo fir se zinda ho gaye.
Is baar main khud kama rahi thi—15,000 rupaye mahina. Maine apna aur apne bhai ka form bhar diya. Ab mujhe lag raha tha ki shayad sab theek ho sakta hai.
Jald hi mere 12th ke exam aa gaye. Main bahut khush thi.
Gaon jaane ki taiyari shuru kar di. Lekin train ka ticket nahi mil raha tha. Majboori me humne general dabbe me safar karne ka faisla kiya.
Station par bhari bheed thi. Jaise-taise hum train me chadh gaye.
Ek seat par ek family baithi thi—ek aurat, uske do bacche aur uska pati. Main unke paas baith gayi. Mere bagal me papa the, aur saamne bhai aur wo aadmi.
Train me itni bheed thi ki pair rakhne ki bhi jagah mushkil se mil rahi thi. Sabka samaan niche pada tha, aur hum log adjust karke baithe the.
Par pata nahi kyun, mera mann ajeeb sa ho raha tha… jaise kuch galat hone wala ho.
Shaam hone lagi. Train apni raftaar se chal rahi thi. Main apne sapno me khoi hui thi—gaon pahunchungi, exam dungi, fir se padhai shuru karungi… sab theek ho jayega.
Tabhi achanak mujhe mehsoos hua ki koi mere pair ko chhoo raha hai.
Maine socha bheed hai, galti se lag gaya hoga. Par phir wo dobara hua… aur is baar tarika alag tha, galat tha.
Maine turant apne pair upar kar liye. Main samajh nahi pa rahi thi ki kya ho raha hai. Main sirf 17 saal ki thi… itni samajh nahi thi ki duniya me aise log bhi hote hain.
Raat hone lagi. Humne train me hi khana khaya aur dheere-dheere sab so gaye. Main bhi thak kar so gayi.
Par raat ke beech achanak mujhe laga ki kisi ne mujhe galat tarike se chhua… mere chest par.
Meri aankh turant khul gayi.
Maine idhar-udhar dekha—mere paas koi nahi tha. Par wo aurat ka pati jaag raha tha…
aur mujhe ghur raha tha.
Uski nazar sab kuch keh rahi thi.
Mera dil zor-zor se dhadakne laga. Mujhe samajh aa gaya ki ye sab usi ki harkat hai…
par mere paas koi saboot nahi tha.
Main darr gayi thi. Itni darr ki main kuch bol bhi nahi paayi.
Us raat meri neend hi nahi lagi.
Main bas ye sochti rahi—
"Kya sach me ye wahi insaan hai? Kya wo fir se kuch karega?"
Aur sabse bada darr…
"Kya aage aur bhi kuch hone wala hai?"
Wo safar mere liye sirf ek journey nahi tha…
wo ek aisa dard tha jo aaj tak mere dil me basa hua hai.
Aapko kya lagta hai…
us raat mere saath ye sab kisne kiya?
Aur agar aapko lag raha hai ki yahi sabse bura tha…
to shayad aap galat hain।
Kyunki us raat ke baad jo hua… usne meri zindagi hamesha ke liye badal di .
Aage kya huaa ye janne ke liye part 4 dekhiye.....